2013 йил Ўзбекистонда "Обод турмуш йили" деб эълон қилинди Пойтахтимизда Конституциянинг 20 йиллигига бағишланган тантанали маросим бўлиб ўтди. Ўзбекистон Республикаси Президенти Ислом Каримов Давлатимиз Конституцияси қабул қилинганлигининг 20 йиллиги муносабати билан ўтказилган тантанали маросимда 2013 йил номини эълон қилди. Маълумки 2012 йил юртимизда "Мустаҳкам оила" йили номи остида кечди ва йил давомида шундай номланган давлат дастурида белгиланган вазифалар ижро этилди. Давлатимиз раҳбари тантанали маросимда нутқ сўзлар экан, "Мустаҳкам оила йили"да амалга оширилган улкан ишлар сарҳисобига тўхталиб ўтди. Унинг сўзларига кўра, далат дастурида белгиланган вазифалар ижроси учун бу йилда 100 млн. АҚШ доллари ва икки триллион сўм сафарбар этилган. Шундан сўнг, юртбошимиз кейинги йилни номлаш борасида фикр юритиб, янги 2013 йилни "Обод турмуш йили" деб номлаш ташаббусини ўртага ташлади. Тадирга ташриф буюрганлар эса ушбу ташаббусни қўллаб- қувватлашди ва шу тариқа 2013 йил Ўзбекистонда "Обод турмуш йили" деб эълон қилинди. Эслатиб ўтамиз, 1997 йилдан бошлаб, мамлакатимизда давлатимиз раҳбари Ислом Каримов ташаббуси билан ҳар бир йилни номлаш анъанага айланган. Аввалги йилларнинг қандай номлангани билан танишинг: 1997 йил - "Инсон манфаатлари йили"; 1998 йил — "Оила йили"; 1999 йил — "Аёллар йили"; 2000 йил — "Соғлом авлод йили"; 2001 йил — "Оналар ва болалар йили"; 2002 йил — "Қарияларни қадрлаш йили"; 2003 йил — "Обод маҳалла йили"; 2004 йил — "Меҳр ва мурувват йили"; 2005 йил — "Сиҳат-саломатлик йили"; 2006 йил — "Ҳомийлар ва шифкорлар йили"; 2007 йил — "Ижтимоий ҳимоялаш йили"; 2008 йил — "Ёшлар йили"; 2009 йил — "Қишлоқ тараққиёти ва фаровонлиги йили"; 2010 йил — "Баркамол авлод йли"; 2011 йил - "Кичик бизнес ва хусусий тадбиркорлик йили"; 2012 йил - "Мустаҳкам оила йили".
