Mashhur ginekolog professor shunday hikoya qilib bergan edi: «Tug'ruqxonada ilk farzand ko'rayotgan ayolning tug'ishiga nimadir xalal berardi. Qarasak, chaqaloqning boshi qalin qizlik pardasiga taqalib turgan ekan. Shu pardani qirqqanimizdan so'nggina bola bemalol tug'ildi. Bu holni ayolning eriga aytib berganimda, u ilk oqshomdan buyon rafiqasini qiz chiqmagan — nomussiz, deya o'ylab hanuzgacha iztirobda yurganligi ma`lum bo'ldi».
Fikrimizni davom etishdan oldin yana bir maktubni ko'zdan kechirsak: «23 yoshga to'ldim. Mendan katta akamni ikki marta uylantirishdi. Ikkovlari ham, afsuski, qiz chiqmadi. Endi meni uylantirishmoqchi, ammo men qizlarga mutloq ishonmayman. Chunki orzularim akamnikiga o'xshab chippakka chiqishidan cho'chiyman. Yaqin bir do'stim uylanishni rejalashtirayotgan qizi bilan to'ygacha qovushib, ko'nglini xotirjam etmoqchi. Ovro'po mamlakatlarida ham yoshlar to'ygacha bir necha yillar davomida o'zlarini sinashadilar-ku?! Men ham shunday yo'l tutaymi? Qizlik pardasidan mosuvo bo'lgan ayrim buzuqilar nomus belgisini ba`zi do'xtirlar yordamida tiklab olishlari rostmi?»
Javob: - Dastavval, bu masalaga tibbiy nuqtai-nazardan yondoshishdan oldin, ajdodlar o'gitlariga bir nazar tashlash maqsadga muvofiqdir. Zero, buyuk mutafakkir Alisher Navoiy: «Hayosizda vafo yo'q, vafosizda hayo yo'q», — deya bejiz aytmaganlar. «Hayo -iymondandir». Shu bois, bufazilat dinu diyonatli insonlarda bo'lishi tabiiy. Yuqoridagi maktub muallifining barcha qizlarga ishonmasligi asossiz, albatta. Shukrki, yurtimizda bokira, iffatli qizlar ko'pchilikni tashkil etadi, benomuslar esa barmoq bilan sanoqli. Ovro'poliklarning nikohsiz yillab «sinashish» uslubi esa fahshdan o'zga narsa emas. Zero, ulug'larimiz, to'ygacha nomusdan mosuvo bo'lish fohishalikdan dalolat ekanligini bejiz fikratimizga singdirishmagan. O'zbekning «Onasini ko'rib, qizini ol», — degan naqlida ham chuqur mazmun bor. Zero, diyonatli, soliha onalar, hamiyatli otalar tarbiyasidagi qizlar aslo benomus bo'lmaydilar. Ushbu o'rinda qizaloqlar jinsiy tarbiyasidagi ayrim xatolar ham nomus pardasiga darz yetkazishi mumkinligini ta`kidlab o'tish joizdir:
1. Qizaloqlar o'g'il bolalarning velosiped, toychoq kabi o'yinchoqlarini ko'p va qo'pol tarzda o'ynashlarida ham ma`lum darajada xatar mavjud. Shu bois ham, o'yinchoqlar bola jinsiga mos bo'lishiga ahamiyat berish joiz.
2. Jinsiy a`zolarning ifloslanib qichishi, ortdagi gijjalar bezovta qilishi natijasida qizchalarning qo'pol qashinishida ham xavfli jihatlar kuzatiladi.
3. Yuvinish paytidagi ehtiyotsizlik sababli ham bokiralik pardasiga ziyon yetishi kamdan-kam hollarda uchraydi.
4. Keskin harakatlar talab qilinadigan sport turlariga, ya`ni yakka kurash, futbol, uzunlikka sakrash kabilarga qizlarni jalb etmaslik ma`qulroq.
5. Ba`zi jaholat girdobiga botgan kimsalarga qizchalarning nozik joyiga bexos turtib yuborish ham xatarli ekanligini yodda tutishlarini maslahat berardik. Odatda, ilk jinsiy munosabat paytida iffat pardasining bir necha tomonlama darz ketib, yorilishi kuzatiladi. Ana shu jarayon og'riq hissi ro'y berishiga sabab bo'ladi. Yangi yorilgan qizlik pardasining chetlari qizarib, shishgan holda qontalashroq bo'lib turadi. Iffat pardasining yorilgan joylari o'rnida 3-10 kun davomida qalinlashgan oqimtir chandiqli to'qima paydo bo'lishi kuzatiladi. Agar ilk visol oqshomida qizning bokiraligiga shubha uyg'ongan bo'lsa, bir necha kun ichida mutaxassis shifokorlarga, ya`ni sud-tibbiy ekspertizasiga ovoza qilmasdan, vazminlik ila murojaat qilish lozim. Bunda hatto sun`iy qizlik pardasini ham bemalol aniqlash mumkin bo'ladi. Imom Buxoriy sahih hadislarida: «Alloh qiyomat kunida rahmat nazari bilan qaramaydigan toifalardan biri ayollari benomus ekanligini bila turib, ular bilan yashovchi erkaklar, ya`ni dayuslar», — ekanligini rivoyat qilganlar. Ammo, tibbiy xulosasiz «podadan oldin chang chiqarish» ham asl erkaklarga yot xislat bo'lishi lozim. Ayrim kuyov yigitlar ilk oqshomdayoq bir necha bor jinsiy aloqa qilishga intilishlari noto'g'ridir, chunki bu qon yo'qotish xavfini vujudga keltiradi. Odatda, iffat pardasi barham topgandan so'ng, kamida uch kun jinsiy yaqinlikning to'xtatib turilishi shart. Aks holda, munosabatdagi og'riq azobi, yosh kelinchakning jinsiy aloqadan bezishiga va hatto turli dardlar (frigidlik, vaginizm, genitaalgiya) ga chalinishiga sabab bo'lishi ham mumkin. Agar ilk oqshomdan keyingi kunlarda ham og'riq hissi kuchayib, qon ketishi kuzatilsa, yosh kelinchakni ginekolog shifokor maslahatiga olib borish maqsadga muvofiqdir.
